Равшан Ҳайдаров бошчилик қилаётган Ўзбекистон U23 терма жамоаси келаси йил Хитойда бўлиб ўтадиган Осиё чемпионатида иштирок этишни истаса, бугун камида 1 очко ишлаб олиши керак бўлади.

БАА мезбонлик қилаётган саралашнинг дастлабки икки турида ўзбекистонлик футболчилар зафар қучишнинг уддасидан чиқа олди. Дастлаб Ливан 3:1 ҳисобида таслим қилинган бўлса, кейинроқ Непал мағлуб этилди — 2:0.

Ўз навбатида БАА U23 ҳам 6 очко тўплади. Мезбонлар Непал устидан 5:0 ҳисобида зафар қучди, кейинроқ Ливанни 1:0 ҳисобида енгди. Улар тўплар нисбатига кўра гуруҳда етакчи.

Регламентга кўра, саралашда 1-ўринни қўлга киритган термалар Осиё чемпионатига аниқ боради. 10 та гуруҳнинг 5 тасидан энг яхши 2-ўрин эгалари ҳам чиқади.

Айни вақтда Равшан Ҳайдаров жамоаси пешқадам бўлиши учун БАА устидан зафар қучиши керак. Дуранг натижа ҳам катта эҳтимол билан Ўзбекистон термасини қитъа чемпионатининг финалига етаклаши мумкин.

БАА ва Ўзбекистон ўртасидаги ҳал қилувчи ўйин бугун Тошкент вақти билан 19:25 да старт олади.