Ўзбекистон Футбол Федерацияси Осиё Футбол Конфедерацияси ҳамда Швейцариянинг “Empower Sports” компанияси билан ҳамкорликда янги лойиҳани амалга ошириш борасида шартнома имзолади.

Келишувга кўра, иккинчи даврадан бошлаб Ўзбекистон чемпионати Олий Лига учрашувларининг тўғридан-тўғри трансляциялари “Empower Sports” компаниясига тегишли Mycujoo.tv сайтида, Олий Лига клублари расмий сайтлари, ижтимоий тармоқларидаги саҳифаларида бир пайтнинг ўзида трансляция қилинади.

Шу муносабат билан 23–24 июл кунлари Тошкентдаги Raddison Blu Hotel меҳмонхонасида Олий Лига иштирокчи жамоалари вакиллари учун махсус семинар-устахона ташкил этилди. Семинар “Empower Sports” компанияси вакиллари Диэго Компаире ва Даниэл Портабелла томонидан олиб борилди.

Унда Швейцария компаниясининг махсус интернет-платформаси бўлган Mycujoo.tv сайтида футбол ўйинларини қай тариқа жонли эфирга узатиш борасида тушунтириш ишлари олиб борилди.

Ушбу семинарда "Насаф"нинг икки нафар ходими Туроб Ҳайдаров ва Эркин Комилов ҳам иштирок этишди. Иккинчи даврадан бошлаб, "Насаф" жамоаси иштирокидаги уй учрашувларининг видеотрансляциялари “Empower Sports” компаниясига тегишли Mycujoo.tv сайтида ва клуб ижтимоий тармоқлардаги расмий каналлари орқали жонли намойиш қилинади. Ушбу трансляцияларни ташкил этишда ходимлар керакли билимларга эга бўлишди ва улар орқали клубга зарур жиҳозлар тақдим этилди.