Ўзбекистонлик боксчи Шоҳжаҳон Эргашев сентябрь ойида АҚШда профессионал боксдаги 11-жангини ўтказади. Рақиб америкалик Хосе Родригес.

АҚШнинг Showtime телеканали билан шартнома имзолаган Эргашев аслида 4 август куни океан ортидаги илк жангини ўтказиши керак эди. Бироқ виза билан боғлиқ муаммолар сабаб Шоҳжаҳон АҚШга ўз вақтида етиб бора олмади.

Боксчининг «Дарё»га маълум қилишича, у бугун — 21 август куни Тошкент-Москва йўналишида парвоз қилади. 10 кун давомида Россия пойтахтида машғулот ўтказиб, шундан сўнг АҚШга йўл олади.

Хосе Родригесга қарши жангнинг аниқ санаси ҳозирча номаълум. Бунга қадар Шоҳжаҳон Эргашев профессионал боксда 10 та жанг ўтказиб, уларнинг барчасида рақибларини нокаут қилишга муваффақ бўлган. Аксар жангларида рақиблар 1-раунддан уёғига ўта олмаган.

Аввалроқ Шоҳжаҳон Эргашев қўлларини операция қилдирганди. 4 августдаги жангнинг сурилгани боксчининг мушаклари ўзини тўлиқ тиклаб олишига ёрдам бериши мумкин.