Жанубий Кореянинг "Sportal Korea" нашри корейсларнинг Ўзбекистон билан ўтказган энг ёрқин ўйинларини ёдга олди. Нашрнинг ёзишича, энг ёрқин хотира бундан 20 йил аввал рўй берган. Ўшанда корейслар Тошкентдан 5:1 ҳисобидаги ғалаба ва 1998 йилги ЖЧ йўлланмаси билан ортга қайтган эди.

"Янаям қувонарлиси, 1994 йили Японияда учралган мағлубият учун ўч ортиғи билан олинди", — деб ёзади "Sportal Korea". Корейс матбуоти 20 йил аввалги тарих такрорланишини жуда истамоқда.

Корейс нашрига кўра, энг қийин дамларда ҳам Жанубий Корея Ўзбекистон терма жамоасини мағлуб этишни уддалаган. Энг ёрқин хотиранинг кейингисида 2011 йилги Осиё Кубогидаги 3-ўрин учун баҳс йодга олинган. Ўшанда корейслар яримфиналда Япониядан енгилган ва руҳан тушкун бўлсалар-да Ўзбекистонни 3:2 ҳисобида енгишган эди.

Кейинги "буюк ғалаба" сифатида 2015 йилги Осиё Кубоги эсга олинган. Бутун ўйин давомида 0:0 ҳисоби бўлиб, қўшимча таймларда 0:2 ҳисобида корейслар ғалаба қозонгани эсимизда.

Бу сафар ҳам корейс футбол мухлислари Жанубий Корея Ўзбекистонни "силлиққина" мағлуб этиб, чўнтакда ЖЧ йўлланмаси билан қайтишини истамоқда.

Отабек Йўлдошев
Жанубий Корея, Сеул