“Қизилқум” – “Бунёдкор” (3:3) учрашувидан кейин мезбонлар устози Ҳамиджон Актамов учрашув ҳақида ўз фикрларини билдирди.

“Бугун икки таймда икки хил футбол гувоҳи бўлдик. Биринчи бўлимда ҳимоядаги пала-партишлик сабаб қарши ҳужумларда иккита гол ўтказиб юбордик. Иккинчи бўлимда эса йигитлар мухлислар кутган ўйинни намойиш этиб беришди. Айниқса, ўйин охирлари жанговар ва очиқ футболга, голлларга бой бўлди.  Агар бироз вақт бўлганида, шубҳасиз, яна гол киритилиши мумкин эди.

Умуман бугун ғалаба учун тайёргарлик кўргандик. Биринчи бўлимдан кейин Шодмонов ва Баҳриддиновни  майдонга тушириб ўрта чизиқни кучайтиришга ҳаракат қилдик. Натижадан қониқмадим, ғалаба қозонишимиз лозим эди. Аммо ўйиндан қониқдим. Таркибдаги ёш футболчиларга ҳам имкон бердик ва улар ўзларига билдирилган ишончни оқлашди. Асосий таркибда ҳаракат қилган Нодирхон Камолов, захирадан майдонга тушган Виктор Григорьев ҳаракатлари таҳсинга лойиқ.

Бугунги ўйин учун барча футболчиларимизга миннатдорчилик билдираман. Мухлислар ҳам бу ўйиндан хурсанд бўлишди”, — дея ўз фикрларини билдириб ўтди “Қизилқум” устози

“Қизилқум” матбуот хизмати.