Кеча, 16 сентябрь куни Туркманистон пойтахти Ёпиқ иншоотларда ва жанг санъатлари бўйича V Осиё ўйинлари бошланди.

Мусобақанинг илк кунида энг катта делегация билан иштирок этаётган ўзбекистонлик спортчилар жами 13 та медални қўлга киритишди. Шулардан 2 таси олтин медаллардир.

Олтин медалларни курашчиларимиз Обидали Мавлонов ҳамда Илҳомжон Машрапов тақдим этишди. Биринчи кун якунларига кўра, Ўзбекистон терма жамоаси 2 та олтин, 3 та кумуш ва 8 та бронза медаль билан умумжамоа ҳисобида иккинчи ўринни эгаллаб турибди.

Мусобақа мезбони Туркманистон терма жамоаси илк кунги баҳсларда 16 та, 14 та кумуш, 7 та бронза медални қўлга киритишди. Кучли учликка Таиланд терма жамоаси якун ясаган. 

Бугун мазкур Осиё ўйинларининг очилиш маросими бўлиб ўтади. “Balich Worldwide Shows” компанияси томонидан ташкил этилаётган маросим сўнгги йилларнинг энг чиройли тадбирларидан бири бўлиши кутиляпти.

Италиялик тадбиркор Марко Балич томонидан асос солинган мазкур компания катта спортдаги фаолиятини Туринда бўлиб ўтган қишки олимпия ўйинларидан бошлаган. Ундан кейин ташкилот Сочи-2014 ва Рио-2016 ўйинларини юқори савияда ўтишини ҳам таъминлади. Ашхобод-2017 улардан-да ўтадиган тарзда бўлиши режалаштирилган.

Шунингдек, Ўзбекистон Президенти Шавкат Мирзиёев мазкур маросимда иштирок этади. Президент Ёпиқ иншоотларда ва жанг санъатлари бўйича V Осиё ўйинларига кўрилган тайёргарлик ишларига юксак баҳо берди.