Англия Премьер-Лигасининг 6-туридан жой олган «Сток Сити» — «Челси» ўйинида лондонлик футболчилар 4 та гол фарқи билан зафар қучди. Беллашувда «Челси»нинг испаниялик ҳужумчиси Альваро Мората 3 та гол уришга муваффақ бўлди.

Squawka нашри Премьер-Лигада хет-трик қайд этган испаниялик футболчилар сони яна 1 тага ошгани борасида маълумот берди. Бунгача «Арсенал» вакили Санти Касорла, «Суонси», «Уиган», «Сандерленд», «Блэкберн» каби клубларда тўп сурган Жорди Гомес, «Челси»нинг эндиликдаги собиқ ҳужумчиси Диего Коста Англия чемпионатида хет-трик қайд этиш бахтига мушарраф бўлганди.

Фернандо Торрес эса туманли Альбионда 4 марта хет-трик қайд этгани билан мақтана олади. Айни пайтда Мадриднинг «Атлетико» клубида тўп сураётган Торрес, «Ливерпуль» ва «Челси»даги фаолияти давомида Англияда катта из қолдирган деб бемалол айтиш мумкин.