Қуйида футбол тарихидаги бир қатор қизиқарли воқеалар ҳақида ўқишингиз мумкин.
1973 йили “Спарта” (Роттердам) ва “Барселона” ўртасидаги учрашувда мезбонлар ҳимоячиси киритган тўп, йилнинг энг кутилмаган голи деб топилди. Ҳимоячи тўпни баландга тепиб юборганида, уни шамол учириб кетади ва тўп ҳавода ёрилиб кетиб… “Барселона” дарвозасига бориб тушади. Учрашув бош ҳаками Форес тўпни алмаштиришни буюради ва футболчиларнинг норозилигига қарамай… голни инобатга олади.
Даниянинг Оденсе шаҳрида 2-дивизион жамоалари баҳс юритишаётганди. Футболчилардан бири тўпни шу қадар кучли зарб билан тепдики, тўп ногоҳон дарвоза устунини синдириб юборди. Қандай чора қўллашни билмай қолган ҳакам, шу заҳотиёқ миллий федерацияга телеграмма жўнатди. Бу иш эса кутилмаган натижа берди. Оденсага олий дивизионнинг 5 та мураббийлари бетакрор ишга қўл урган ҳужумчи билан учрашгани етиб келишди, футбол федерациясидан эса негадир жавоб келмади.
Брзаилиялик ҳимоячи Пинейрони ўз дарвозасига тўп киритиш борасида рекордчи дейишади. У бир мавсумнинг ўзида 10 та автагол қайд этганди. Жамоа раҳбарлари ўзаро келишган ҳолда Пинейрони ҳужум чизиғига ўтказишди. Лекин илк учрашувдаёқ “рекордчи” яна ўз дарвозасига тўп киритиб қўйди. Футболчи 25 ёшга тўлганда эса жамоадошлари унга компас совға қилишди ва унга шундай сўзлар битилганди: “Унутма, рақиб қарама-қарши томонда”.
Болливуд қироли Шохрух Хон болалигидан актёр бўлишни эмас, футбол юлдузи бўлишни орзу қилган. Мақсадига етишиш учун ҳатто футбол мактабига борган. Ўсмирлик чоҒларида навбатдаги ўйинларнинг бирида оёғи қаттиқ лат егач, спорт оламини тарк этишга мажбур бўлган. У ҳамон футболнинг ашаддий мухлисидир. Буни унинг “Олға Ҳиндистон” филмида яратган образидан ҳам билиб олса бўлади.
