“Насаф” жамоасида асосий дарвозабони ҳисобланган Элдорбек Суюнов иккинчи даврадан “Пахтакор” сафига ўтгач, унинг ўрнини  асосий дарвозабон сифатида Санжар Қувватов эгаллади.

Санжар Қувватов мана тўрт учрашувки ўзи қўриқлаётган дарвозасини даҳлсизлигини сақлаб турибди. Унинг қуруқ серияси 360 дақиқага етди. Сўнгги бор у Қаршидаги “Бунёдкор” жамоаси билан бўлган учрашувда пенальтидан гол ўтказган эди.

Бу йилги чемпионатда ушбу икки дарвозабон статистикасини солиштирсак, қуйидаги ҳолатга гувоҳ бўламиз.

Элдорбек Суюнов биринчи даврадаги учрашувларда 10 марта дарвозамизни қўриқлаб, майдонда 900 дақиқа ҳаракат қилган ва 11 марта гол ўтказган эди.

Санжар Қувватов жорий чемпионатда дарвозамизни 12та учрашувда қўриқлади, у 1080 дақиқа ҳаракат қилди ва 5 марта гол ўтказиб юборди. Ушбу дарвозабонимиз майдонга тушган 12 учрашувнинг 9тасида жамоамиз ғалаба қозонган, 3 учрашувда мағлубиятга учраган. Элдорбек Суюнов мйдонга тушган 10 учрашувнинг 4тасида жамоамиз мағлубият аламини тортган ва 2 учрашувда дурангга имзо чеккан.

Қувватовнинг бу йилги чемпионатда кўпгина ўйинларда, жуда қийин вазиятларда ҳам маҳоратини намойиш қилиб, жамоамизни муқаррар голлардан асраб қолаётганига гувоҳ бўлаяпмиз.

Посбонимизнинг бу ҳаракатларига тасанно айтиб, кейинги ўйинларда ҳам омадлар тилаб қоламиз.