Каталонияда ўтказилган мустақиллик референдуми Испания конституциясига кўра ноқонунийдир. Бу ҳақда Брюсселдаги матбуот анжумани вақтида Еврокомиссия расмий вакили Маргаритис Схинас маълум қилди. Шу билан бирга у томонларни очиқ мулоқотга чақириб, сиёсий муаммоларни зўравонлик билан ҳал этмасликни сўради.
«Бу Испаниянинг ички иши, бу масала Испания қонунлари доирасида ҳал этилиши керак»,— дея жаноб Схингаснинг сўзларини келтирган Reuters агентлиги.
Схингас шунингдек, бугун Еврокомиссия раҳбари Жан Клод Юнкер ҳамда Испания бош вазири Мариано Рахой ўртасида учрашув ўтказилиши ҳақида маълум қилган.
Бугун тонгда Каталония ҳукумати Испаниядан мустақил бўлиш бўйича референдум якунларига бағишланган шошилинч йиғилиш ўтказди. Унда маълум қилинишича, Каталония мустақиллиги учун референдумда иштирок этган 2 миллиондан ортиқ кишининг 90 фоизи овоз берган. Испания ҳукумати овоз бериш натижаларини ноқонуний деб топди.
Аммо ОАВда референдум вақтида Испания полицияси томонидан каталонияликларга нисбатан қўлланган зўравонликлар кенг муҳокама этилмоқда.
