Ўзбекистонлик профессионал боксчи Фазлиддин Ғойибназаров жорий йилнинг 9 декабрь куни АҚШнинг Нью-Йорк шаҳридаги муҳташам Madison Square Garden аренасида мексикалик Алексис Дел Боскега қарши жанг ўтказиши режалаштирилаётган эди.
Лекин номаълум сабабларга кўра Фазлиддиннинг рақиби россиялик Андрей Климовга ўзгартирилганди.
Режага кўра, Фазлиддин шу куни Андрей Климовга қарши рингга кўтарилиши керак эди. Лекин кутилмаганда 35 ёшли Климов ҳамда унинг жамоаси ўз режасини ўзгартирди ва Фазлиддин билан жанг ўтказмаслигини маълум қилди.
Россиялик боксчи охирги 3 та жангида кетма-кет мағлубият аламини тотиб кўргани сабабми, тўртинчи мағлубиятни олдини шу тариқа олган кўринади. Тез орада “Top Rank” компанияси Ғойибназаровнинг тўртинчи жангига янги рақиб топиб беради.
Эслатиб ўтамиз, машҳур промоутер Боб Арумга тегишли Top Rank промоутерлик компанияси мижози бўлган Фазлиддин Ғойибназаров 22 сентябрь куни АҚШнинг Аризона штати Тусон шаҳрида мексикалик Виктор Росасни 80:72, 80:72, 80:72 ҳисобида мағлуб этганди.
