Осиё минтақасидан ўрин олган ЖЧ-2018 саралаш плей-офф босқичи доирасида Австралия ва Сурия ўртасида жавоб ўйини бўлиб ўтди. Яшил қитъа вакиллари катта қийинчилик билан кейинги босқич йўлланмасини қўлга киритди.

Учрашувнинг 6-дақиқасидаёқ сурияликлар Умар ас-Соманинг голи эвазига ҳисобни очишди. Орадан 7 дақиқа ўтиб Тим Кэйхилл мувозанатни тиклади. Натижада австралияликларнинг сафардаги гол борасидаги устунлиги йўққа чиқди. Ушбу ҳисоб асосий вақтда ўзгармади. Натижада ушбу баҳсда қўшимча бўлимлар белгиланди.

Айнан қўшимча бўлимлар бошланган пайтда эътиборли ҳолат кузатилди. Учрашувни бошқариб бораётган ўзбекистонлик ФИФА рефериси Равшан Эрматов ўрнига захира ҳаками Ильгиз Танташев бош ҳакамга айланди. Маълумотларга қараганда, Эрматов жароҳат олган.

Танташев ўйинни бошқара бошлагач, суриялик Маҳмуд ал-Мавас иккинчи сариқ карточкани олиб, майдонни тарк этди. Бир киши кўп бўлиб қолган Австралия терма жамоаси, бундан самарали фойдаланди. 109-дақиқада яна ўша Кэйхилл жамоасини ҳисобда олдинга олиб чиқди.

Ўйин тугаши арафасида Сурия ҳисобни тенглаштиришига бир бахя қолди. Давроза устуни Австралияни голдан қутқариб қолди. Шу тариқа, 210 дақиқа давоми этган иккита ўйин натижасида Австралия кейинги босқичга йўл олди. Уларга КОНКАКАФ минтақасининг тўртинчи жамоаси рақиблик қилди. Бу Панама ёки Гондурас термаларидан бири бўлади.

ЖЧ-2018 саралаш. Осиё, плей-офф, жавоб ўйини
АВСТРАЛИЯ - СУРИЯ 2:1. Асосий вақт — 1:1. Қўшимча бўлимлар — 1:0
Голлар: Тим Кэйхилл (13, 109) — Умар ас-Сома (6)
Дастлабки ўйин — 1:1