Ўзбекистон олий лигасининг бир қатор жамоалари ёзда Осиё футбол Конфедерацияси томонидан огоҳлантириш хатлари олган. Бу ҳақда «Пахтакор» клуби ходими Равшан Салимов ўзининг твиттердаги саҳифасида ёзиб қолдирган.

Унинг ёзишича, Олий лигада иштирок этаётган бир қатор жамоаларга ОФКдан хат келган. Хатда клубнинг маошлардан қарздор экани, агар ушбу қарзлардан тезда қутулмаса, жамоага ОЧЛда қатнашиш учун лицензия берилмаслиги тўғрисида огоҳлантириш бўлган.

«Хат келган клублар рўйхатида, ОЧЛга чиқиш имкониятига эга бўлган бўлган жамоалар ҳам бор эди. Агар келгуси мавсумда қайсидир жамоа ОЧЛда қатнаша олмаса ҳайрон бўлмайман», деб ёзган Салимов.

ОФК томонидан юборилган хат айнан қайси клубларга жўнатилганига аниқлик киритилмаган. 

Эслатиб ўтамиз, Осиё чемпионлар лигасида иштирок этиш учун Ўзбекистонда ҳозирда Олий лига пешқадами «Локомотив» ва таъқибчилар «Насаф», «Пахтакор» ва «Бунёдкор» имкониятга эга бўлиб турибди.