O‘zbekiston oliy ligasining bir qator jamoalari yozda Osiyo futbol Konfederasiyasi tomonidan ogohlantirish xatlari olgan. Bu haqda «Paxtakor» klubi xodimi Ravshan Salimov o‘zining tvitterdagi sahifasida yozib qoldirgan.
Uning yozishicha, Oliy ligada ishtirok etayotgan bir qator jamoalarga OFKdan xat kelgan. Xatda klubning maoshlardan qarzdor ekani, agar ushbu qarzlardan tezda qutulmasa, jamoaga OCHLda qatnashish uchun lisenziya berilmasligi to‘g‘risida ogohlantirish bo‘lgan.
«Xat kelgan klublar ro‘yxatida, OCHLga chiqish imkoniyatiga ega bo‘lgan bo‘lgan jamoalar ham bor edi. Agar kelgusi mavsumda qaysidir jamoa OCHLda qatnasha olmasa hayron bo‘lmayman», deb yozgan Salimov.
OFK tomonidan yuborilgan xat aynan qaysi klublarga jo‘natilganiga aniqlik kiritilmagan.
Eslatib o‘tamiz, Osiyo chempionlar ligasida ishtirok etish uchun O‘zbekistonda hozirda Oliy liga peshqadami «Lokomotiv» va ta’qibchilar «Nasaf», «Paxtakor» va «Bunyodkor» imkoniyatga ega bo‘lib turibdi.
