Австралия терма жамоаси келаси йили Россияда бўладиган жаҳон чемпионати йўлланмасини қўлга киритди. "Соккеруз" Гондурасга қарши бўлиб ўтган қитъалараро плей-офф босқичининг жавоб баҳсида ишончли ғалабага эришди.

Ҳозиргина якунига етган учрашувнинг биринчи бўлимида ҳисоб очилмади. Иккинчи 45 дақиқаликда Австралия термаси сардори Майл Единак катта саҳнага чиқди. Учрашувнинг 54-дақиқасида у томонидан амалга оширилган жарима зарбаси натижасида тўп ҳимоячига тегиб, тўрга бориб тушди. Баҳснинг 72 ва 85-дақиқаларида аргентиналик ҳакам Гондурас дарвозаси томон 2та пенальти белгилади. Ҳар иккала 11 метрли жарима зарбасидан Единак унумли фойдаланди.

КОНКАКАФ вакили ўйинга қўшиб берилган 4-дақиқада битта жавоб тўпини киритди, холос.

Гондурас майдонида бўлиб ўтган дастлабки ўйинда ҳисоб очилмаганди. Шу боис, Австралия Осиёнинг бешинчи жамоаси сифатида ЖЧ-2018га йўл олди.

ЖЧ-2018. Қитъалараро плей-офф. Жавоб ўйини.

Австралия – Гондурас 3:1 (0:0)
15 ноябрь, 14.00, «ANZ Stadium»
Голлар: 1:0 – 53 Единак, 2:0 – 72, пенальти Единак, 3:0 – 85, пенальти Единак, 3:1 – 90 Элис.
Австралия – Райан, Бехич, Райт, Сэйнсбери, Миллиган (Тройси, 89), Муй, Единак, Лекки, Рогич (Круз, 77), Кэйхилл (Юрич, 66), Жерман.
Гондурас – Эскобер, Фигероа, Паласиос, Исагирре (Фигероа, 42; Мартинес, 73), Альварадо, Акоста, Кларос, Бекелес, Лосано, Элис, Киото (Эрнандес, 75).
Огоҳлантиришлар: Жерман (3), Фигероа (19), Муй (45), Кларос (57), Лекки (81), Паласиос (84), Сэйнсбери (88).
Биринчи ўйин – 0:0