Avstraliya terma jamoasi kelasi yili Rossiyada bo‘ladigan jahon chempionati yo‘llanmasini qo‘lga kiritdi. "Sokkeruz" Gondurasga qarshi bo‘lib o‘tgan qit’alararo pley-off bosqichining javob bahsida ishonchli g‘alabaga erishdi.

Hozirgina yakuniga yetgan uchrashuvning birinchi bo‘limida hisob ochilmadi. Ikkinchi 45 daqiqalikda Avstraliya termasi sardori Mayl Yedinak katta sahnaga chiqdi. Uchrashuvning 54-daqiqasida u tomonidan amalga oshirilgan jarima zarbasi natijasida to‘p himoyachiga tegib, to‘rga borib tushdi. Bahsning 72 va 85-daqiqalarida argentinalik hakam Gonduras darvozasi tomon 2ta penalti belgiladi. Har ikkala 11 metrli jarima zarbasidan Yedinak unumli foydalandi.

KONKAKAF vakili o‘yinga qo‘shib berilgan 4-daqiqada bitta javob to‘pini kiritdi, xolos.

Gonduras maydonida bo‘lib o‘tgan dastlabki o‘yinda hisob ochilmagandi. Shu bois, Avstraliya Osiyoning beshinchi jamoasi sifatida JCH-2018ga yo‘l oldi.

JCH-2018. Qit’alararo pley-off. Javob o‘yini.

Avstraliya – Gonduras 3:1 (0:0)
15 noyabr, 14.00, «ANZ Stadium»
Gollar: 1:0 – 53 Yedinak, 2:0 – 72, penalti Yedinak, 3:0 – 85, penalti Yedinak, 3:1 – 90 Elis.
Avstraliya – Rayan, Bexich, Rayt, Seynsberi, Milligan (Troysi, 89), Muy, Yedinak, Lekki, Rogich (Kruz, 77), Keyxill (YUrich, 66), Jerman.
Gonduras – Eskober, Figeroa, Palasios, Isagirre (Figeroa, 42; Martines, 73), Alvarado, Akosta, Klaros, Bekeles, Losano, Elis, Kioto (Ernandes, 75).
Ogohlantirishlar: Jerman (3), Figeroa (19), Muy (45), Klaros (57), Lekki (81), Palasios (84), Seynsberi (88).
Birinchi o‘yin – 0:0