Кеча Европа Чемпионлар лигасининг "E" гуруҳида "Севилья" ўз майдонида "Ливерпуль"ни меҳмон қилди. Муросасиз ўтган баҳсда андалусияликлар биринчи таймда 0:3 ҳисобида ортда қола туриб иккинчи таймда 3та тўп фарқини йўққа чиқара олишди. Учрашув якунланганидан сўнг эса "Севилья" клуби бош мураббийи борасида кутилмаган баёнот берди.
Маълум бўлишича, Эдуардо Бериццо простата бези саратонига чалинган ва уни жарроҳлик амалиёти кутмоқда.
Баҳсдан сўнг, баъзи футболчилар ҳам ўз интервьюсида, бош мураббийнинг хаста эканига ишора қилди.
Хусусан, яримҳимоячи Эвер Банега мутахассисни қўллаб-қувватлаб: "Бу инсон бизни тўғри йўлга бошламоқда. Ҳаммамиз унга далда беришимиз ва қўллаб-қувватлашимиз лозим" - деган.
"Севилья" бош мураббийиини тўлиқ қўллаб-қувватлайди ва унга тез орада соғайиб кетишини тилайди", — дейилади клуб баёнотида.
