Дортмунднинг «Боруссия» клуби ҳужумчиси Пьер-Эмерик Обамеянг фаолиятини Хитой клубларидан бирида давом эттириш ҳақида ўйламоқда.
Calciomercato тарқатган хабарга кўра, Чин ўлкасининг иккита клуби габонлик футболчининг хизматларига қизиқиш билдирмоқда. Гап мамлакатнинг кучли жамоаларидан бири «Гуанжоу Эвергранд» ва ушбу мавсум бронза медалини қўлга киритган «Тянжин Цюаньцзянь» ҳақида кетмоқда.
Ҳар иккала клуб январь ойида футболчини сотиб олишга тайёр. Дортмундликлар раҳбарияти футболчига нисбатан интизомий жазо қўллаб, уни «Штутгарт»га қарши ўйиндан четлатгани учун Обамеянг ранжиди.
Ёзда ҳужумчига Англиянинг «Арсенал» ва «Манчестер Сити» жамоалари қизиқишганди. Лекин Европа клублари қишки трансфер пайтида уни сотиб олишни режалаштиришмаяпти. Обамеянг ва «Боруссия» ўртасидаги шартнома 2020 йилга қадар тузилган.
