"Ал Жазира" бош мураббийи Хенк тен Кате клублар ўртасида жаҳон чемпионатида "Реал" билан учрашув олдидан фикрини ҳазил тариқасида билдирди.

"Биз учта автобус қўйишимиз керак. Балки иккитасини Моуриньодан сўраб турарман. Воқеага реал кўз билан қараш керак. Ғалаба учун имкониятларимиз кам. Маҳоратдаги фарқ жуда катта, аммо жамоам охиригача курашади.

Биз доим Англия, Испания, Германия чемпионатлари ўйинларини кўрамиз. Энди эса шогирдларим Криштиану Роналду билан бир майдонда тўп сурадилар. Йигитлар нимани ҳис қилаётганларини тасаввур қилишим мумкин. Умид қиламанки, йигитлар кўп асабийлашмайдилар.

Биз ўйинчиларимизга қўшимча туртки беришимиз шарт эмас. Улар ҳаммаси PlayStation ўйнайдилар, кўпчилиги "Реал"га мухлислик қиладилар. Энди "Реал" ўйинчилари билан майдонда курашамиз. КЎпчилик ўйинчиларимиз учун ҳаёт-мамот ўйини бўлади", - дейди тен Кате.

Клублар жаҳон чемпионати яримфиналининг "Ал Жазира" - "Реал" учрашуви бугун, 13 декабрь бўлиб ўтади.