“Эрудит СПОРТ” нашри қуйида томошабоп ўтиши кутилаётган тўрт тўқнашувни ўтказиб юбормасликни тавсия қилади:
№4-матч: “Лион” – “Марсель”
17 декабр, якшанба, соат: 01:00
ТВ-трансляция: Спорт ТВ
Ўзаро учрашувлар:
30 ҒАЛАБА 40 ДУРАНГ 26 ҒАЛАБА
Сўнгги учрашув: “Лион” – “Марсель” 0:0 ва 3:1
Имконият: 35/30/35
Жамоаларнинг трансфер қиймати:
“Лион” – “Марсель”
149,55 миллион евро VS 146,25 миллион евро
Ўйин ҳақида икки оғиз:
Франция чемпионати деганда мухлислар кўз ўнгида “ПСЖ” ва “Монако” гавдаланади. Бироқ бу гигантлар соясида юрган яна икки клуб бор-ки, уларни ҳисобдан чиқариш ярамайди. Қачонлардир “Лион” ҳамда “Марсель” номларини эшитган француз жамоалари дағ-дағ титраган. “Шерлар”ни шуғуллантираётган Бруно Женезио ҳам, “Жанубликлар”ни бошқараётган Руди Гарсия ҳам жамоасининг шонли тарихини қайтариш йўлида бош қотиряпти. Ҳаракатлар секин-аста самара беряпти. Мисол учун, “Лион” ҳар ўйинда рақиб дарвозасига ўртача 2,5 гол уришга муваффақ бўлмоқда. Устига-устак, майдон эгалари Лига 1нинг энг ёш жамоаларидан биридир (ўртача 23,8 ёш). Мураббий Руди Гарсия етакчилигида “Марсель”нинг ҳам кўкрагига шамол тегяпти. Ўн бир матчдан буён жамоани енгадиган рақиб топилмади. Эътиборлиси, меҳмонлар устози бир ўқ билан “икки қуён”ни уриш имконига эга: бир томондан, олти ўйинга етган ғалабасиз серияга чек қўйилади, “десерти”га турнир жадвалида “Лион”дан ўзиб кетади.
№3-матч: “Боруссия” Дортмунд – “Хоффенхайм”
16 декабр, шанба, соат: 22:30
ТВ-трансляция: Спорт ТВ
Ўзаро учрашувлар:
7 ҒАЛАБА 7 ДУРАНГ 4 ҒАЛАБА
Сўнгги учрашув: “Боруссия” Дортмунд – “Хоффенхайм” 2:2 ва 2:1
Имконият: 30/40/30
Жамоаларнинг трансфер қиймати:
“Боруссия” Дортмунд – “Хоффенхайм”
438,90 миллион евро VS 129,90 миллион евро
Ўйин ҳақида икки оғиз:
“Боруссия” мутасаддилари ишонган “Петер Бос лойиҳаси” ўзини оқламади. Голланд мураббийи дортмундликлар рулида 24 ўйин ўтказиб, бор-йўғи 33 фоизида ғалабани нишонлади. Турган гапки, оғзидаги ошини олдиравериши жамоа хўжайинларини тоқатини тоқ қилди. Айниқса, ғалабани унутгани (саккиз ўйинда беш мағлубият, уч дуранг), саккиз матчнинг еттитасида дарвозасидан камида 2 тўп олиб чиққани ишқибозларнинг хунобини оширди. Шу тариқа “Боруссия” бошқа бир Петерга, австриялик мутахассис Петер Штёгерга ишониб топширилди. Табиийки, у биринчи давранинг охирги, ўзининг “Тукли арилар” постидаги илк учрашувида нималарга қодирлигини намойиш этмоқчи бўлади. Ўттиз ёшида элликни қоралаб қўйган ҳамкасбларини боши берк кўчага киритаётган Юлиан Нагельсманни ҳам ғалабадан бошқа натижа қониқтирмайди. “Олмониялик Моуриньо” дортмундликлар билан уч марта куч синашган, аммо ғалабани ўз томонига оғдира билмаган. Шубҳа йўқ-ки, Нагельсман рақибининг муаммолар гирдобида ўралашиб юрганидан фойдаланиб қолишга ҳаракат қилади.
№2-матч: “Арсенал” – “Вест Хэм”
19 декабр, сешанба, соат: 00:45
ТВ-трансляция: Futbol TV
Ўзаро учрашувлар:
1 ҒАЛАБА 0 ДУРАНГ 1 ҒАЛАБА
Сўнгги учрашув: “Арсенал” – “Вест Хэм Юнайтед” 1:3 ва 2:1
Имконият: 40/30/30
Жамоаларнинг трансфер қиймати:
“Арсенал” – “Вест Хэм Юнайтед”
508 миллион евро VS 215,90 миллион евро
Ўйин ҳақида икки оғиз:
“Босқончилар” шотланд мутахассиси қўл остига ўтгач жамоа кўчасига байрамлар қайтди. “Лондон дербиси”да Контенинг “Челси”си тўхтатилди. Эндиликда “Вест Хэм” устози Арсен Венгер бошчилигидаги “Арсенал”га чиқиш эшикларини кўрсатмоқчи. Бошқача айтганда, Славен Билич бошлаб кетган ишни Дэвид Мойес ниҳоясига етказишга уриниб кўради. Эътиборлиси, томонларнинг йўли етти кун ичида икки марта туташади. Лига кубоги доирасида ўтадиган қарама-қаршилик ҳам чемпионатдаги матч каби ҳар меҳмонлар учун муҳим аҳамият касб этади. Таъкидлаш керакки, “Босқончилар” бешинчи раундгача “оловли йўл”ни босиб ўтди. Ҳатто тўртинчи босқичда ирода кўрсатиб, “Тоттенхэм”дан устун келди. “Тўпчилар”да эса бунинг тескариси кузатилди. Айнан Лига кубоги пайти “Канонирлар” асосий таркиби ҳордиқ чиқаради. Захира ўриндиғини тўлдириб турганлар майдонга ташланади. Маълумотларга кўра, мутахассислар турли турнирлар баҳонасида 28 бора учрашган ва яққол устунлик француз мураббийи томонида (ўйинларнинг 61 фоизида қўли баланд келган).
№1-матч: “Манчестер Сити” – “Тоттенхэм”
16 декабр, шанба, соат: 22:30
ТВ-трансляция: Futbol TV
Ўзаро учрашувлар:
50 ҒАЛАБА 31 ДУРАНГ 51 ҒАЛАБА
Сўнгги учрашув: “Манчестер Сити” – “Тоттенхэм” 0:2 ва 2:2
Имконият: 35/30/35
Жамоаларнинг трансфер қиймати:
“Манчестер Сити” – “Тоттенхэм”
629,50 миллион евро VS 551 миллион евро
Ўйин ҳақида икки оғиз:
Жорий мавсумдаги илк мағлубиятни “Шахтёр”дан қабул қилган “Шаҳарликлар” Премьер лигада ҳамон “асов отлигича” қолмоқда. Статистика ҳам буни тасдиқлайди: “Сити” ўн беш ўйинда ғалабани илиб кетди. Жумладан, “чемпионлар пойгаси”га киришган “Ливерпуль”, “Челси”, “Арсенал” ва “Манчестер Юнайтед”га қарши ўйинларда ғалабани ўз томонига оғдирди. Инглиз грандлари орасида фақат “Тоттенхэм” қолди кураги ерга тегмаган. “Тақачилар” эса икки мавсумдан буён Манчестер клубига рўйхўшлик бермайди (тўрт тўқнашувнинг учта ғалаба). “Шаҳарликлар” мураббийлик постини эгаллаб турган Гвардиола ҳам ҳозирча “Тоттенхэм” қаршилигини синдириш чорасини топмаган (бир мағлубият, бир дуранг). Шу кеча-кундузда Маурисио Почеттино шогирдларининг иши юришмаяпти. Клуб ўн олти турнинг саккизтасида очко йўқотди (ярми дуранг, ярми мағлубият). “Тақачилар” фанатларини кўпроқ ўн икки очконинг қулоғини ушлаб кетгани ҳавотирга соляпти. Катта эҳтимоллар билан шу куни бошқа топ-жамоалар Лондон клубига мухлислик қилади. “Интрига” сақлаб қолиниши учун ҳам.
Улуғбек РАҲМОНҚУЛОВ, «Эрудит Спорт» газетаси.
