Ўзбекистон олимпия терма жамоаси бош мураббийи Равшан Ҳайдаров Қатарга қарши 1-тур учрашувидан кейинги матбуот анжуманида иштирок этди ва жамоа бугун кутилганидек ўйин намойиш эта олмаганини таъкидлади.

“Бугунги ўйин тенг курашлар остида кечди. Афсуски, ҳимояда хатога йўл қўйдик ва гол ўтказиб юбордик. Албатта, хатоларни кўриб чиқамиз ва кейинги учрашувда вазиятни ўнглашга ҳаракат қиламиз”, - деди Ҳайдаров.

“Иккинчи таймда жароҳат олгани учун Акром Комиловни алмаштирдик. Бу ҳам учрашувга ўз таъсирини кўрсатди. Бугун, айрим футболчилар ўз имкониятларидан паст даражада ҳаракат қилишди. Бунинг сабабини албатта, ўрганиб чиқамиз. Балки турнирдаги илк учрашув бўлгани учун бироз босим сезилгандир. Ҳали турнир энди бошланди. Гуруҳдаги вазиятни қийинлаштириб қўйдик, аммо, имкониятимиз бор экан, охиригача курашамиз”, - дейди Ўзбекистон олимпия терма жамоаси бош мураббийи Равшан Ҳайдаров.