Ўзбекистон терма жамоаси Хитойда ўтаётган 23 ёшгача бўлган футболчилар ўртасидаги Осиё чемпионатининг ярим финал босқичига чиқди. Жамоамиз чорак финалда Япония устидан йирик ҳисобда ғалаба қозонди.

Равшан Ҳайдаров шогирдлари дастлабки 45 дақиқа ичида рақиб дарвозасига жавобсиз 3та тўп йўллашди. Баҳс бошиданоқ ўзбекистонликлар ташаббусни ўз қўлларига олиб, ҳужумкор ўйин намойиш қила бошлашди. Вакилларимиз бурчак тўпини ўйинга киритганидан кейин 31-дақиқада Жавоҳир Сиддиқов 16 метрлардан кучли зарба бериб, ҳисобни очди. Японлар ҳали ўзига келиб улгурмасидан терма жамоамиз рақиб дарвозасига яна 2 марта йўл топишди. Ҳамдамов ва Яхшибоевнинг голлари эвазига Ўзбекистон 3:0 ҳисобида олдинга чиқиб олди.

Иккинчи бўлимнинг дебюти ўзбекистонлик учун яна омадли келди. Майдон марказидан берилган узатма натижасида Яхшибоев тўпни рақиб жарима майдончаси ичида эгаллаб олди, бир ҳимоячини алдади ва чап оёқда олис бурчакни ишғол қилди.

Орадан кўп ўтмасдан терма жамоамиз бешинчи голни уришига бир бахя қолди. Комилов чап қанотдан юқорилатиб узатма берди. Ҳимоячи бош билан қайтарган тўпни Жасур Яхшибоев эгаллади ва чап оёқда зарба йўллади. Тўп устун ва тўсин кесишган нуқтага тегиб, майдонни тарк этди! Қолган дақиқаларда Ўзбекистон U23 терма жамоамиз хотиржамлик билан ҳимояланди ва йирик ҳисобдаги ғалабани сақлаб қолди.

Шу тариқа, олимпиячиларимиз Осиё чемпионатининг ярим финалига йўл олди. Бу босқичда жамоамизга Жанубий Корея - Малайзия жуфтлиги ғолиби тўқнаш келади.

ОФК U23. Чорак финал.
ЯПОНИЯ - ЎБЕКИСТОН - 0:4 (0:3)
Голлар: Жавоҳир Сиддиқов (31), Достонбек Ҳамдамов (35), Жасур Яхшибоев (39, 47)
Огоҳлантиришлар: Кёсаке Тагава (85) — Достон Турсунов (78)
Япония - Риёсуки Кожима, Со Фужитани, Теруки Ҳара, Киёсуки Тагава, Кейта Эндо, Юто Ивасаки, Такаги Акито, Шион Иноуэ (Хироки Ито 68), Юта Камий (с), Таийо Кога, Юго Татсута.
Ўзбекистон: Ботирали Эргашев, Рустамжон Ашурматов, Акрамжон Комилов, Аббосжон Отахонов, Азизжон Ғаниев, Одилжон Ҳамробеков (Абдужамол Исроилов 86), Жасурбек Яхшибоев, Забихилло Ўринбоев (Дониёржон Нарзуллаев 81), Жавоҳир Сиддиқов (Бобур Абдухолиқов 74), Достонбек Ҳамдамов, Достонбек Турсунов.