Неймарнинг жароҳати билан боғлиқ янги тафсилотлар маълум бўлди.

Унга кўра, айни дамда футболчида иккита вариант бор — операция ёки жарроҳлик амалиётисиз муолажалар орқали даволаниш. Биринчи вариантда Неймар 8-12 ҳафтада тикланади ва тўлиқ соғайиб кетади. Иккинчи вариантда эса футболчи шунчаки муолажалар олиб юради ва махсус оёқ кийимида ҳаракатланади. Бу ҳолатда Неймар 6 ҳафтада тикланиши мумкин, аммо бунга тўлиқ кафолат йўқ. Табиийки, иккинчи вариант таваккалга асосланган.

Ўз навбатида “ПСЖ” Неймарнинг “Реал”га қарши ўйнашини истамоқда. Париж клуби раҳбариятининг фикрича, “Реал” — жамоа йўлидаги асосий тўсиқ. Агар “ПСЖ” Мадрид клубидан ўта олса, финалгача муаммосиз етиб боради. Шу боис “ПСЖ” раҳбарияти Неймарни “Реал”га қарши ўйнатиб, кейин агар жамоа “қироллик клуби”ни мағлуб эта олса, бразилиялик футболчига ЕЧЛ финалига қадар дам бермоқчи. Шунда Неймар финалгача даволаниб олиш имконига эга бўлади. “ПСЖ” раҳбарияти шуни режа қилмоқда.

Бироқ агар иккинчи вариантга амал қилинса, Неймарнинг аҳволи кейинчалик оғирлашиши ва у ҳатто жаҳон чемпионатини ўтказиб юбориши ҳам мумкин.