Айни пайтда Ўзбекистон олимпия терма жамоаси Андижон шаҳридаги “Соғлом авлод” стадионида Кения олимпия терма жамоасига қарши баҳс олиб бормоқда. Афсуски, биринчи бўлимдан кейин вакилларимиз 0:2 ҳисобида мағлубиятга учрашмоқда. Аммо умид қиламизки, танаффусда Равшан Ҳайдаров шогирдларига тегишли кўрсатмалар беради ва иккинчи бўлимда вакилларимиз вазиятни ўнглашади.
Кения олимпия терма жамоасига қарши ўйин Андижонда том маънодаги футбол байрамига айланиб кетди.
Катта футболни соғинган андижонлик мухлислар бугун “Соғлом авлод” стадионига “оқиб” келишди. 19 минг нафар мухлисга мўлжалланган ўйингоҳ ишқибозлар билан тўлиб тошди.
Осиё чемпионига айланган олимпия терма жамоамиз аъзоларини бевосита стадиондан туриб қўллаб қувватлаш истагида бўлганлар жуда кўп эди. Бу эса терма жамоамиз футболчилари учун катта руҳий далда бўлиши аниқ.
Ўйиндан аввал вилоят футбол федерацияси раҳбарияти сўзга чиқиб, терма жамоамиз аъзоларига омад тилашди. Шунингдек, ҳақиқий ўзбекона ҳурмат кўрсатган ҳолда Ўзбекистон ОТЖ бош мураббийи Равшан Ҳайдаров ва меҳмонлар - кениялик мураббийларга зарбоф чопонлар кийдирилди.
