Ayni paytda O‘zbekiston olimpiya terma jamoasi Andijon shahridagi “Sog‘lom avlod” stadionida Keniya olimpiya terma jamoasiga qarshi bahs olib bormoqda. Afsuski, birinchi bo‘limdan keyin vakillarimiz 0:2 hisobida mag‘lubiyatga uchrashmoqda. Ammo umid qilamizki, tanaffusda Ravshan Haydarov shogirdlariga tegishli ko‘rsatmalar beradi va ikkinchi bo‘limda vakillarimiz vaziyatni o‘nglashadi.

Keniya olimpiya terma jamoasiga qarshi o‘yin Andijonda tom ma’nodagi futbol bayramiga aylanib ketdi.

Katta futbolni sog‘ingan andijonlik muxlislar bugun “Sog‘lom avlod” stadioniga “oqib” kelishdi. 19 ming nafar muxlisga mo‘ljallangan o‘yingoh ishqibozlar bilan to‘lib toshdi.

Osiyo chempioniga aylangan olimpiya terma jamoamiz a’zolarini bevosita stadiondan turib qo‘llab quvvatlash istagida bo‘lganlar juda ko‘p edi. Bu esa terma jamoamiz futbolchilari uchun katta ruhiy dalda bo‘lishi aniq.

O‘yindan avval viloyat futbol federasiyasi rahbariyati so‘zga chiqib, terma jamoamiz a’zolariga omad tilashdi. Shuningdek, haqiqiy o‘zbekona hurmat ko‘rsatgan holda O‘zbekiston OTJ bosh murabbiyi Ravshan Haydarov va mehmonlar - keniyalik murabbiylarga zarbof choponlar kiydirildi.