“Навбаҳор” ва “Насаф” жамоалари ўртасидаги учрашув якунига етгач, ҳар икки жамоа вакиллари иштирокида матбуот анжумани ўтказилди.
Матбуот анжуманининг дастлабки қисмида “Насаф” жамоаси бош мураббийи Рўзиқул Бердиев ва жамоа дарвозабони Санжар Қувватовлар ОАВ вакилларининг саволларига жавоб қайтаришди.
Рўзиқул Бердиев: - Бугун учрашув курашларга бой тарзда ўтди. Ҳар икки жамоа ҳам тўп, майдон ва ғалаба учун курашишди. Айнан шу сабабли ўйин сифат борасида мазмунсизроқ чиққан бўлиши мумкин. Ўйлашимча баҳс дурангга мос бўлди.
Бу ҳол ғалабани ҳеч бир жамоа томонда бўлишига имкон бермади. Дуранг ҳақли тарзда қайд этилди деб айтган бўлардим. “Навбаҳор” ва “Насаф” каби жамоалар ҳеч қачон дуранг натижадан қониқиш ҳосил қилмайди.
Олдига юқори мақсадларни қўядиган жамоалар ҳеч қачон дуранг кузатилганида, бундан қаноат ҳосил қилмайди. Шундай экан натижадан қониқмадим. Баҳсда икки жамоа ҳам ғалабага эришиши мумкин эди.
Масалан, “Навбаҳор” жамоасининг ҳужумлари чоғида тўп дарвоза устуни ва тўсинига тегиб қайтди. Ўз навбатида жамоамиз қарши ҳужумларда яхши ҳаракат қила олмадик. Сўнгги учрашувларда кўплаб вазиятларга эга бўлсакда, имкониятлардан самарали фойдалана олмаяпмиз.
Ғалаба қозониш учун эса вазиятларни голга айлантириш талаб этилади. Гол ура олмаётганлигимиз бизнинг камчилигимиз саналади. Ҳимояда бехато тўп сураётган бўлсакда, ҳужумда совуққонлик билан ҳаракат қилишимиз лозим.
Черан маълум вақт давомида жароҳатини даволашга мажбур бўлди. Айни пайтда унда ўйин амалиёти камроқ. Бугун уни “Навбаҳор” мухлисларининг босимига дош бера олиши учун майдонга туширгандик.
Иккинчидан наманганликлар стандарт вазиятлар жуда хавфли рақиб саналади. Шунинг учун иккинчи қаватда яхшироқ ўйнаш мақсадида Драганни таркибга киритгандик.
Санжар Қувватов: - Ўйин жуда қийин бўлди. Бугун ғалаба қозонишимиз ёки мағлубиятга учрашимиз ҳам мумкин эди. Бош мураббий айтганларидек, ўйин сифат борасида у қадар яхши ўтмади.
Майдонда ҳар икки жамоа кескин курашга киришди. Мухлислар ҳам жамоаларни яхши қўллаб-қувватлашди.
Фурсатдан фойдаланиб, Қаршидан келиб бизга далба бўлган ишқибозларимизга раҳмат айтаман.
