«Истиқлол» ҳамда «Андижон» жамоалари ўртасидаги учрашувдан сўнг андижонликлар бош мураббийи Элдор Сакаев ўйин ҳақидаги фикрлари билан ўртоқлашди.

- Бугун қийин ўйин бўлишини билардик. Чунки «Истиқлол» жиддий рақиб эди. Қолаверса, бу жамоани тажрибали мураббий бошқармоқда. Лекин биз футболчиларимизни фақат ғалаба қозониш руҳида тайёрладик. Айниқса, тезкор урилган гол руҳиятимизни янада кўтариб юборди.

- Бизни қўллаб-қувватлаш учун Андижондан келган мухлисларга алоҳида миннатдорчилигимни билдираман. Биз Андижон халқи учун, уларни хурсанд қилиш учун ўйнаяпмиз. Шунингдек, бизга ажойиб шароитларни яратиб бераётгани учун Андижон вилояти ҳокими Шуҳратбек Қўшоқбоевич Абдураҳмоновга ҳам ўз миннатдорчилигимизни билдирамиз.

- Айтишим керакки, дастлабки турда «Машъал»га қарши ўйинимиздан кўра бу сафарги беллашув биз учун оғир кечиши аниқ эди. Шунга қарамай, футболчиларимиз ажойиб ўйин намойиш этишди. Голли имкониятлардан самарали фойдалана олганимиз туфайли ҳам ҳисоб йирик кўриниш олди.

«Андижон» матбуот хизмати.