Александр Глебнинг фаолияти идеал ўтган, деса бўлаверади.
У Германия, Англия ва Испания чемпионатларида фаолият юритган, Чемпионлар Лигасида зафар қучган, «Барселона»да Лео Месси билан бирга тўп сурган.
Яқинда Россиянинг «Футбол» ҳафтаномаси беларуслик футболчи билан суҳбат уюштирди.
— Сиз футболи ривожланмаган мамлакатдан Германияга бориб, юқори савияда ўйин намойиш қилган камсонли футболчилардан бирисиз. Бу қандай юз берганди?
— Биз ўсмирлар терма жамоаси билан турнирга борганмиз. У ерда Фербер исмли германиялик агент «Штутгарт» ва «Мангейм» клублари билан ўртоқлик учрашувлари ташкил қилганди.
Умуман олганда, ўша ўйинлардан сўнг мени кўрикка чақиришган. Беларусь ва Германия футболи ўртасидаги фарқ анча катта эди.
— Феликс Магат қўл остида ўйнаганингизда, машғулотларга немисча ёндашиш қандайлигини билиб олганмисиз?
— «Штутгарт»га ўтганимда, жамоани Ральф Рангник бошқарарди. Ундан кейин Магат қабул қилиб олган. У жуда қаттиққўл мураббий эди. Жисмоний тайёргарликка ҳаддан зиёд кўп эътибор қаратарди. Баъзида қўшимча юклар билан ҳам югурардик.
— Туманли ўлкадаги фаолиятингиз ҳақида нима дейсиз?
— Аслида, Англияга аввалроқ боришим ҳам мумкин эди. «Штутгарт»даги иккинчи мавсумимдан сўнг «Ливерпул»дан яхши таклиф тушганди. Германияга клуб вакиллари ҳам боришган, лекин мерсисайдликлар клуб билан келиша олишмаганди.
— «Арсенал» жиддий ҳаракат қилганми?
— Ҳа. Арсен Венгер билан Лондонга боришимдан бир йил олдин танишганман. Суҳбатлашиб, вазиятни ўрганганмиз. Бир мавсумдан сўнг клублар барчасини келишиб олишган ва мен «Арсенал» аъзосига айланганман.
— Музокараларни Венгернинг ўзи олиб борганми?
— Ҳа. Биринчи учрашувдан кейиноқ менда Арсен билан ишлаш истаги пайдо бўлган.
— Венгер - ажойиб мотиватор, лекин яхши тактик эмас. Шундайми?
— Балки. Биз ҳеч қачон тактик машғулотлар олиб бормаганмиз ва рақибларни муҳокама қилмаганмиз. Майдонда «Арсенал» ўз ўйинини намойиш қилишга уринган.
Рақиб ҳаракатига қараб тактика танламаган. Балки жамоанинг кўп йиллардан бери соврин юта олмаётганига айнан шу жиҳат сабабдир?! Ҳамиша олдинга интилганмиз. Қаердадир омадимиз келган, баъзан эса йўқ.
— Сиз ўйнаган пайтдаги «Арсенал»нинг энг яхши ўйини қайси?
— «Барселона»га қарши ЕЧЛ финали бўлса керак. Унда ҳам омадимиз келмаган.
— Ўша кезлари «Арсенал» сафида кўплаб кучли футболчилар тўп суришарди. Уларнинг орасида энг зўри ким бўлган?
— Бергкамп, Анри ва Пиреслар билан ўйнаш имкониятига эга бўлганман. Бу футболчиларнинг савияси ўта юқори.
— Англия футболида сизни яна нима ажаблантирган?
— Биринчидан, тўп майдонда жуда тез ҳаракатланади, ҳимоядан ҳужумларга ўтиш бир неча сония ичида амалга ошади. Иккинчидан, муҳит. АПЛ стадионларидаги ҳолат Бундеслигадагидан кўпроқ маъқул келган. Мухлислар тинимсиз куйлашади. Буни ёқтирмасликнинг иложи йўқ.
— Анрини энг яхши футболчилардан бири, деб атадингиз. Тақдирни қарангки, у билан «Барселона»да ҳам бирга ўйнагансиз. Айтишларича, бироз муддат бирга яшаган экансизлар.
— Ҳа, бир уйда. «Арсенал» клуби сиз учун ҳамма нарсани шай қилади. Хонадон топади, жойлаштириб қўяди. Яъни, сиздан бор эътиборни футболга қаратиш талаб этилади.
Англияда ушбу масалада вақт сарфламайсиз. Барселонада эса бошқача. Барча муаммоларингизни ўзингиз ҳал қилишингиз керак. Клуб меҳмонхонада яшашим учун ёрдам берган, холос. Раҳбарият доимий яшаш учун жой топишимга уч ой мухлат берган. Бу вақт учун меҳмонхонадан хона ажратиб беришган.
Анри эса нима учун ёлғиз яшаётганимни сўраб, уйига таклиф қилган. Тьерриникида яшаб юрганимда унинг дўстлари менга уй топиб беришган.
— Ибрагимовичнинг автобиографиясини ўқидингизми? Унда «Барса» мактаб сингари таърифланган.
— Китобни ўқимадим. «Барса», футболчилар ҳақида ёмон таассуротга эга эмасман. Аксинча, Хави, Месси, Иньесталар билан бирга тўп суриш ёқимли. Лео ҳақида гапирадиган бўлсам, «Барселона»га боргунимга қадар ҳам унинг қандай футболчи эканлигини билардим.
Кўзим билан кўрганимдан кейин уни таърифлаганларидан ҳам кучли эканлигига гувоҳ бўлдим. Баъзида автобусга чиқсак, Мессини жаҳон футболи юлдузлари ҳам мақташарди. Ҳимоячилар машғулотлар пайтида унга ташланишга чўчишарди. Чунки масхарабозга айланиб қолишдан қўрқардилар.
— Себастьян Скиллачининг айтишича, Мессини фақат оёғига тепиб тўхтатиш мумкин экан...
— Агар Лео яхши кайфиятда бўлса, уни тўхтатиш мутлақо имконсиз ишга айланади. Умуман олганда, Месси анча ёпиқ инсон эди. Ҳамиша Габриэл Милито билан юрарди.
InterFutbol.uz нинг Telegram даги саҳифасига уланинг – энг сўнгги янгиликлар, қизиқарли блоглар ва таҳлилий материаллар энди бир тўпламда.
