Урганч шаҳрида оғир атлетика бўйича ўсмирлар ва ёшлар ўртасида Осиё чемпионати давом этмоқда.
Бироз аввал ўсмирлар ўртасида -77 кг вазн тоифасида мусобақада иштирок этган ҳамюртимиз Муҳаммадқодир Тоштемиров Осиё чемпионатининг олтин медалига сазовор бўлди. Спортчимиз даст кўтаришда 141 кг., силтаб кўтаришда эса 168 кг. тош кўтарди ва иккикураш якунларига кўра 309 кг. натижа кўрсатиб, Осиё чемпионлигини қўлга киритди.
Ёшлар ўртасида -77 кг вазн тоифасидаги беллашувларда қатнашган Умирбай Мавленов эса мусобақанинг кумуш медали соҳибига айланди. Ҳамюртимиз даст кўтаришда 143 кг., силтаб кўтаришда эса 170 кг. тошни ўзига бўйсундира олди. Иккикураш якунига кўра 313 кг. натижа қайд этган Умирбай Осиё чемпионатининг кумуш медалини қўлга киритди.
Шу тариқа, Урганчдаги Осиё чемпионатидаги медалларимиз сони 6тага етди. Спортчиларимиз ҳисобида 3та олтин ва 3та кумуш медали мавжуд.
