Ўзбекистон чемпионатининг 12-турига старт берилди. Қаршининг "Насаф" клуби ўз майдонида мусобақа аутсайдери — "Нефтчи"ни қабул қилди.

Стадионга йиғилган ишқибозлар ҳамда учрашувда ойнаи жаҳон орқали кузатган мухлислар анча зерикарли баҳсга гувоҳ бўлишди. Футболчиларда негадир катта иштиёқ кузатилмади.

Бутун ўйин давомида мухлислар гол кўришмади. Фақатгина учрашув сўнгига келиб Рўзиқул Бердиев шогирдлари ғалабани илиб кетишга муваффақ бўлишди. Баҳснинг 89-дақиқасида Драган Черан "Нефтчи" дарвозаси томон белгиланган пенальтидан самарали фойдаланиб, ҳисобни очди. Қўшиб берилган дақиқаларда эса Игорь Голбан "Насаф"нинг иккинчи голини рақиб дарвозасига жойлади.

Ушбу ғалабадан кейин "Насаф" ўз очколарини 17тага етказиб, мусобақа жадвалидаги позициясини бироз мустаҳкамлаб олди. Фарғоналиклар эса сўнгги поғонада қолишмоқда.

Pepsi Суперлига, 12-тур.

“Насаф” – “Нефтчи” 2:0.

Голлар: Драган Черан (90 пенальти), Игорь Голбан (90+2).

“Насаф”: 35.Санжар Қувватов, 5.Ғолиб Ғайбуллаев (21.Жаҳонгир Алиев, 75), 6.Азизжон Ғаниев, 7.Одилжон Ҳамробеков, 14.Шароф Муҳитдинов, 17.Дониёр Нарзуллаев (55.Славко Лукич, 46), 22.Игорь Голбан, 31.Сайдулло Раҳматов, 52.Шерзод Темиров (20.Ислом Кенжабоев, 64), 69.Драган Черан (с), 92.Умарбек Эшмуродов.

“Нефтчи”: 1.Абдумавлон Абдужалилов, 2.Искандар Шойқулов, 3.Шукурали Пўлатов (с), 19.Авазбек Ўлмасалиев, 20.Ҳусниддин Ғофуров (27.Даврон Маматов, 90+2), 22.Абдужамол Исроилов, 23.Абдураҳмон Абдулҳақов (9.Абдул Азиз Юсупов, 74), 25.Алишер Саматов, 71.Хуршид Асқаралиев, 90.Исломбек Каримов (6.Отабек Аҳмаджонов, 58), 95.Достонбек Турсунов.

Огоҳлантиришлар: Абдул Азиз Юсупов 75.