ФИФА кенгаши шу йилнинг 13 июнь куни терма жамоалари рейтингини ҳисоблаш тизимини ўзгартириш масаласини муҳокама қилади. Бир неча йиллар давомида ҳозирги тизимда айрим камчиликлар борлиги аниқланган. Боиси, айни пайтдаги формула терма жамоаларнинг ҳақиқий кучини акс эттирмайди.

Жумладан, Жаҳон чемпионатини ўзида қабул қиладиган жамоа 2 йил давомида расмий ўйинларда иштирок этмасдан, фақат ўртоқлик ўйинлари билан чекланади. Натижада мезбон терма жамоа ФИФА рейтингида пастга шўнғиб кетади.

Ҳозирги пайтда ФИФА терма жамоаларнинг сўнгги 48 ой ичида ўтказилган ўйинлари инобатга олинади. Терма жамоаларнинг сўнгги 1 йил ичидаги ўйинлари 1 коэффициентга кўпайтирилса, 2 йил олдинги баҳслар — 0,5, 3 йил аввалги учрашувлар — 0,3, 4 йил аввалги ўйинлар натижалари 0,2 коэффициентга кўпайтирилади.

Бундан ташқари, ўртоқлик ўйинлари учун — 1, саралаш баҳслари учун — 2,5, қитъа чемпионатлари ва Конфедерациялар кубоги мусобақаси учун — 3, жаҳон чемпионати учун — 4 коэффициент белгиланган.

Шунингдек, 13 май куни Москва шаҳрида бўлиб ўтадиган ФИФА кенгашида 2026 йилги Жаҳон чемпионати мезбони номи эълон қилинади.