Россияда бошланаётган футбол бўйича жаҳон чемпионатини Ўзбекистонда намойиш қилиш бўйича экслюзив ҳуқуқни UzReport телеканали сотиб олганидан хабарингиз бор. Ўзбекистон миллий телерадио компаниясининг "Спорт" канали ҳам имкон қадар ушбу футбол байрамини ёритиб боришга ҳаракат қилади. Бу ҳақда "Спорт" шарҳловчиси Хайрулла Ҳамидов ўзининг телеграмдаги каналида хабар тарқатди.

«Спорт» канали ЖЧ-2018 транцляцияси ҳуқуқини сотиб ололмагани учун биз муҳим ўйинларни "Oriatdono" радиоканали орқали ёки ижтимоий тармоқдаги имкони бор йўллар орқали шарҳлаб борамиз. Саҳифамизни кузатиб борсангиз, ўша ўйинлардан олдин чиқишларимизни эълон қилиб борамиз.

Чунки мантиқан ҳам вазият шундай экан, деб томошабин бўлиб қолишимиз нотўғри эди. «Спорт» канали ижодкорлари эса, ҳар куни кун давомида мундиалга бағишланган кўрсатувлар тайёрлашмоқда. Жонли эфир орқали чиқишлар кўпайган.

Тараддуд бугундан бошланди: бироздан сўнг каналимизни кузатишни бошланг. Ҳатто ўзим ҳам «Шедевр»нинг бугунги сонини (18:45) айнан шу мусобақага бағишлаганман.

Садоқат оғир кунларда сезилади, деганларидек, охиригача шу канал учун курашаверамиз. Ҳаттоки, пешонамизда Тотти бўлиб яшаш бор эса-да...", — дея маълумот қолдирган Хайрулла Ҳамидов.