Rossiyada boshlanayotgan futbol bo‘yicha jahon chempionatini O‘zbekistonda namoyish qilish bo‘yicha ekslyuziv huquqni UzReport telekanali sotib olganidan xabaringiz bor. O‘zbekiston milliy teleradio kompaniyasining "Sport" kanali ham imkon qadar ushbu futbol bayramini yoritib borishga harakat qiladi. Bu haqda "Sport" sharhlovchisi Xayrulla Hamidov o‘zining telegramdagi kanalida xabar tarqatdi.

«Sport» kanali JCH-2018 translyasiyasi huquqini sotib ololmagani uchun biz muhim o‘yinlarni "Oriatdono" radiokanali orqali yoki ijtimoiy tarmoqdagi imkoni bor yo‘llar orqali sharhlab boramiz. Sahifamizni kuzatib borsangiz, o‘sha o‘yinlardan oldin chiqishlarimizni e’lon qilib boramiz.

Chunki mantiqan ham vaziyat shunday ekan, deb tomoshabin bo‘lib qolishimiz noto‘g‘ri edi. «Sport» kanali ijodkorlari esa, har kuni kun davomida mundialga bag‘ishlangan ko‘rsatuvlar tayyorlashmoqda. Jonli efir orqali chiqishlar ko‘paygan.

Taraddud bugundan boshlandi: birozdan so‘ng kanalimizni kuzatishni boshlang. Hatto o‘zim ham «Shedevr»ning bugungi sonini (18:45) aynan shu musobaqaga bag‘ishlaganman.

Sadoqat og‘ir kunlarda seziladi, deganlaridek, oxirigacha shu kanal uchun kurashaveramiz. Hattoki, peshonamizda Totti bo‘lib yashash bor esa-da...", — deya ma’lumot qoldirgan Xayrulla Hamidov.