Кеча Ўзбекистон чемпионатида расман трансфер ойнаси очилди. Айни дамда бир қатор клублар трансфер бозорида фаол иштирок эта бошлашди.
Хусусан, давралар оралиғида юзага келган трансфер ойнасидан АГМК ҳам унумли фойдаланишга ҳаракат қилмоқда. Жамоа раҳбарияти бугун бир қатор футболчилар билан келишувга эришди.
Мавсумни Қаршининг «Насаф» жамоасида ўтказган таниқли ярим ҳимоячи Жасур Ҳасанов АГМК аъзосига айланди. Шунингдек, олмалиқлик мухлисларга қадрли бўлган, АГМК шарафини элитада энг кўп ўйинда ҳимоя этган Зоҳир Пиримов ҳам фаолиятини яна жонажон жамоасида давом эттиради. Пиримов бу йилги мавсумни Наманганнинг «Навбаҳор» жамоасида бошлаганди.
Жамоа таркибига яна икки футболчи Алишер Саматов ва Азамат Исроилов ҳам таклиф этилган. Томонлар ўртасида келишув амалга ошса улар ҳам жамоамиз шарафини ҳимоя этишлари мумкин. Саматов Фарғонанинг «Нефтчи» жамоасида тўп суриб келаётганди. Исроилов эса Жиззахнинг «Сўғдиёна» жамоаси аъзоси эди. Азамат ҳам Зоҳир каби бундан бир неча йил аввал "Нефтчи" аъзоси бўлган.
Жамоа таркибини кучайтириш ишлари трансферлар ойнаси ёпилгунга қадар давом эттирилади.
* * *
Маълумотларга қараганда, «Пахтакор»да заҳира ўриндиғида қолиб кетган Камолиддин Тожиев жамоасини ўзгартириш пайида. Футболчига «Металлург» жиддий қизиқиш билдирмоқда. Айни дамда бекободликлар сафида “Пахтакор”нинг кўплаб футболчилари тўп суришмоқда.
* * *
АГМКни тарк этган Вадим Чемиртан яна собиқ жамоаси “Бухоро”га қайтиши мумкин. Улуғбек Бақоев молдавалик ҳужумчига қизиқмоқда. Чемиртан айнан Бухородаги ўйинлари орқали ўзбекистонлик мухлислар меҳрини қозонганди.
* * *
«Сўғдиёна» клубини тарк этган жамоа сардори Акмал Холмуродов яна собиқ клуби “Динамо”га қайтиши мумкин. Даврон Файзиев футболчига қизиқиш билдирмоқда. Самарқандликлар ҳам трансфер пайтида таркибни кучайтириш учун селекция ишларига зўр беришган.
* * *
Куннинг энг шов-шувли трансфери чемпионат пешқадами томонидан амалга оширилди. Тошкентнинг «Пахтакор» жамоаси узоқ музокаралардан сўнг, «Насаф» ҳужумчиси Драган Черан билан келишувга эришди. Футболчи энди Тошкент клубида тўп суради.
