Kecha O‘zbekiston chempionatida rasman transfer oynasi ochildi. Ayni damda bir qator klublar transfer bozorida faol ishtirok eta boshlashdi.
Xususan, davralar oralig‘ida yuzaga kelgan transfer oynasidan AGMK ham unumli foydalanishga harakat qilmoqda. Jamoa rahbariyati bugun bir qator futbolchilar bilan kelishuvga erishdi.
Mavsumni Qarshining «Nasaf» jamoasida o‘tkazgan taniqli yarim himoyachi Jasur Hasanov AGMK a’zosiga aylandi. Shuningdek, olmaliqlik muxlislarga qadrli bo‘lgan, AGMK sharafini elitada eng ko‘p o‘yinda himoya etgan Zohir Pirimov ham faoliyatini yana jonajon jamoasida davom ettiradi. Pirimov bu yilgi mavsumni Namanganning «Navbahor» jamoasida boshlagandi.
Jamoa tarkibiga yana ikki futbolchi Alisher Samatov va Azamat Isroilov ham taklif etilgan. Tomonlar o‘rtasida kelishuv amalga oshsa ular ham jamoamiz sharafini himoya etishlari mumkin. Samatov Farg‘onaning «Neftchi» jamoasida to‘p surib kelayotgandi. Isroilov esa Jizzaxning «So‘g‘diyona» jamoasi a’zosi edi. Azamat ham Zohir kabi bundan bir necha yil avval "Neftchi" a’zosi bo‘lgan.
Jamoa tarkibini kuchaytirish ishlari transferlar oynasi yopilgunga qadar davom ettiriladi.
* * *
Ma’lumotlarga qaraganda, «Paxtakor»da zahira o‘rindig‘ida qolib ketgan Kamoliddin Tojiyev jamoasini o‘zgartirish payida. Futbolchiga «Metallurg» jiddiy qiziqish bildirmoqda. Ayni damda bekobodliklar safida “Paxtakor”ning ko‘plab futbolchilari to‘p surishmoqda.
* * *
AGMKni tark etgan Vadim Chemirtan yana sobiq jamoasi “Buxoro”ga qaytishi mumkin. Ulug‘bek Baqoyev moldavalik hujumchiga qiziqmoqda. Chemirtan aynan Buxorodagi o‘yinlari orqali o‘zbekistonlik muxlislar mehrini qozongandi.
* * *
«So‘g‘diyona» klubini tark etgan jamoa sardori Akmal Xolmurodov yana sobiq klubi “Dinamo”ga qaytishi mumkin. Davron Fayziyev futbolchiga qiziqish bildirmoqda. Samarqandliklar ham transfer paytida tarkibni kuchaytirish uchun seleksiya ishlariga zo‘r berishgan.
* * *
Kunning eng shov-shuvli transferi chempionat peshqadami tomonidan amalga oshirildi. Toshkentning «Paxtakor» jamoasi uzoq muzokaralardan so‘ng, «Nasaf» hujumchisi Dragan Cheran bilan kelishuvga erishdi. Futbolchi endi Toshkent klubida to‘p suradi.
