Сербия футбол уюшмаси ЖЧ-2018 гуруҳ босқичининг 2-тури доирасида Швейцарияга қарши кечган ўйинни бошқариб борган немис ҳаками Феликс Брих устидан ФИФАга арз қилиш ниятида эканини маълум қилди.
Эслатиб ўтамиз, кеча Калининграддаги баҳсда серблар 1:2 ҳисобида мағлубиятга учрашди.
"Швейцария билан ўйиндаги ҳакамлар фаолияти устидан ФИФАга шикоят юборамиз. Пенальти билан боғлиқ вазиятни ҳисобга олмаганда ҳам ҳакамлар кўплаб вазиятларда рақибимиз фойдасига қарорлар қабул қилди", - дея баёнот берган ташкилот бош котиби Йован Шурбатович.
Шурбатович, шунингдек, ФИФА Швейцария терма жамоаси яримҳимоячиси Шердан Шакирига Косово байроғи туширилган бутсада майдонга тушишга рухсат берганидан норозилигини билдирган.
