Мавсумнинг иккинчи ярмига тайёргарлик кўраётган “Металлург” жамоаси таркибида юз бераётган ўзгаришлар мухлисларимизни қизиқтирмасдан қолмайди.
Шундан келиб чиққан ҳолда “Металлург”нинг асосий таркиби ҳамда ёшлар таркиби йиғинларида бир қатор янги футболчилар қатнашишяпти. Улар орасида пойтахт, водий жамоаларидан келган тажрибали ўйинчилар билан бир қаторда ёшлар биринчилигида тўп сураётган футболчилар ҳам бор.
Улардан кимлар жамоада қолиши ҳали аниқ бўлмаганлиги боис маълумот беришни лозим топмадик. Бироқ клуб раҳбарияти шу ҳафта ўтадиган назорат учрашувларидан кейин Ўзбекистон футбол ассоциациясига қўшимча буюртманомаларни топширади. Шундан сўнг, янги келиб қўшилган ўйинчилар ҳақида аниқ маълумотларни сиз азиз мухлисларимизга етказамиз.
Жамоани бугунги кунда тарк этган ўйинчилар ҳақида эса янгиликлар бор. Хусусан, Дилёрбек Ирматов ўзининг қадрдон жамоаси – “Нефтчи”га қайтиб кетди. Ҳужумчи Павел Пуришкин эса Самарқанднинг “Динамо” жамоаси билан келишувга эришди. Шунингдек, Жавоҳир Соҳибов, Жамшид Юсупов ва Саиджамол Давлатжоновлар билан ҳам хайрлашилди.
“Металлург” футбол клуби раҳбарияти, мухлислари номидан ушбу футболчиларнинг барчасига мавсумнинг биринчи қисмидаги ёрдамлари, ҳамкорлиги учун катта миннатдорчилик билдирамиз ва уларга келгуси фаолиятларида омад ёр бўлишини тилаймиз.
