Mavsumning ikkinchi yarmiga tayyorgarlik ko‘rayotgan “Metallurg” jamoasi tarkibida yuz berayotgan o‘zgarishlar muxlislarimizni qiziqtirmasdan qolmaydi.

Shundan kelib chiqqan holda “Metallurg”ning asosiy tarkibi hamda yoshlar tarkibi yig‘inlarida bir qator yangi futbolchilar qatnashishyapti. Ular orasida poytaxt, vodiy jamoalaridan kelgan tajribali o‘yinchilar bilan bir qatorda yoshlar birinchiligida to‘p surayotgan futbolchilar ham bor.

Ulardan kimlar jamoada qolishi hali aniq bo‘lmaganligi bois ma’lumot berishni lozim topmadik. Biroq klub rahbariyati shu hafta o‘tadigan nazorat uchrashuvlaridan keyin O‘zbekiston futbol assosiasiyasiga qo‘shimcha buyurtmanomalarni topshiradi. Shundan so‘ng, yangi kelib qo‘shilgan o‘yinchilar haqida aniq ma’lumotlarni siz aziz muxlislarimizga yetkazamiz.

Jamoani bugungi kunda tark etgan o‘yinchilar haqida esa yangiliklar bor. Xususan, Dilyorbek Irmatov o‘zining qadrdon jamoasi – “Neftchi”ga qaytib ketdi. Hujumchi Pavel Purishkin esa Samarqandning “Dinamo” jamoasi bilan kelishuvga erishdi. Shuningdek, Javohir Sohibov, Jamshid Yusupov va Saidjamol Davlatjonovlar bilan ham xayrlashildi.

“Metallurg” futbol klubi rahbariyati, muxlislari nomidan ushbu futbolchilarning barchasiga mavsumning birinchi qismidagi yordamlari, hamkorligi uchun katta minnatdorchilik bildiramiz va ularga kelgusi faoliyatlarida omad yor bo‘lishini tilaymiz.