Жаҳон чемпионатининг "G" гуруҳида 3-тур ўйинлари бошланиш арафасида. Бу гуруҳда Панама ва Тунис терма жамоаларида плей-оффга чиқиш имконияти қолмаган. Англия ва Бельгия терма жамоалари эса гуруҳ ғолиблиги учун кураш олиб боришади (гуруҳда 1-ўринни эгаллаган жамоа нимчорак финалда Япония билан ўйнайди, 2-ўрин соҳиби — Колумбия билан).

Сўнгги тур олдидан Англия ва Бельгия бир хил кўрсаткичга эга бўлиб турибди. Ҳар иккала жамоа ҳисобида 6тадан очко мавжуд ва тўплар нисбати ҳам бир хил — 8-2. Бугун ғалаба қозонган жамоа гуруҳ ғолибига айланади. Бу тушунарли.

Дуранг қайд этилса-чи? Унда фейр-плей қоидаси ишга тушади. Бунда терма жамоалар гуруҳ босқичида олган сариқ ва қизил карточкалар ҳисоб-китоб қилинади. Ҳозирча Англияда 2та, Бельгияда эса 3та "сариқ" мавжуд, қизил карточкалар эса йўқ. Демак, ҳозирча устунлик инглизлар томонида.

Бугунги ўйин дуранг билан якунланса-ю, иккала жамоа футболчилари бугун огоҳлантириш олмаса ёки тенг миқдорда огоҳлантириш олишса, инглизлар гуруҳда 1-ўринни банд этишади.

Мабодо, бугун Гарет Саутгейт шогирдлари рақибга нисбатан 1та кўпроқ сариқ карточка олишса, у ҳолда фейр-плей қоидаси бўйича ҳам мутлақ тенглик юзага келади. Бундай ҳолатда ЖЧ-2018 ташкилий қўмитаси гуруҳ ғолибини аниқлаш учун ҚУРЪАга мурожаат қилади.

P.S. Регламентга бир бандни киритиш керак экан: гуруҳ якуни бўйича икки жамоа барча кўрсаткичлар бўйича бир хил кўрсаткичга эга бўлса-ю, сўнгги турда улар ўзаро тўқнаш келишган бўлса, қайси жамоада юқори поғонада бўлишини аниқлаш учун улар ўртасида пенальтилар серияси амалга оширилади. Аммо бундай банд ЖЧ-2018 регламентида мавжуд эмас.

P.S.-2. "G" гуруҳи ғолиби 1/8 финалда нисбатан кучсизроқ ҳисобланган Японияга тўғри келади. Аммо чорак финалда бу жуфтлик ғолиби Бразилия/Мексика жуфтлиги ғолибига қарши тўқнаш келади.

Нимчорак финалда Колумбия билан ўйнайдиган терма эса, бу босқичдан ўтиб олса, чорак финалда Швеция/Швейцария жуфтлиги ғолибига рақиб бўлади. Хўш, қайси бири қулайроқ: гуруҳда 1-ўринни эгаллашми ёки иккинчи бўлиш?