Jahon chempionatining "G" guruhida 3-tur o‘yinlari boshlanish arafasida. Bu guruhda Panama va Tunis terma jamoalarida pley-offga chiqish imkoniyati qolmagan. Angliya va Belgiya terma jamoalari esa guruh g‘olibligi uchun kurash olib borishadi (guruhda 1-o‘rinni egallagan jamoa nimchorak finalda Yaponiya bilan o‘ynaydi, 2-o‘rin sohibi — Kolumbiya bilan).

So‘nggi tur oldidan Angliya va Belgiya bir xil ko‘rsatkichga ega bo‘lib turibdi. Har ikkala jamoa hisobida 6tadan ochko mavjud va to‘plar nisbati ham bir xil — 8-2. Bugun g‘alaba qozongan jamoa guruh g‘olibiga aylanadi. Bu tushunarli.

Durang qayd etilsa-chi? Unda feyr-pley qoidasi ishga tushadi. Bunda terma jamoalar guruh bosqichida olgan sariq va qizil kartochkalar hisob-kitob qilinadi. Hozircha Angliyada 2ta, Belgiyada esa 3ta "sariq" mavjud, qizil kartochkalar esa yo‘q. Demak, hozircha ustunlik inglizlar tomonida.

Bugungi o‘yin durang bilan yakunlansa-yu, ikkala jamoa futbolchilari bugun ogohlantirish olmasa yoki teng miqdorda ogohlantirish olishsa, inglizlar guruhda 1-o‘rinni band etishadi.

Mabodo, bugun Garet Sautgeyt shogirdlari raqibga nisbatan 1ta ko‘proq sariq kartochka olishsa, u holda feyr-pley qoidasi bo‘yicha ham mutlaq tenglik yuzaga keladi. Bunday holatda JCH-2018 tashkiliy qo‘mitasi guruh g‘olibini aniqlash uchun QUR’Aga murojaat qiladi.

P.S. Reglamentga bir bandni kiritish kerak ekan: guruh yakuni bo‘yicha ikki jamoa barcha ko‘rsatkichlar bo‘yicha bir xil ko‘rsatkichga ega bo‘lsa-yu, so‘nggi turda ular o‘zaro to‘qnash kelishgan bo‘lsa, qaysi jamoada yuqori pog‘onada bo‘lishini aniqlash uchun ular o‘rtasida penaltilar seriyasi amalga oshiriladi. Ammo bunday band JCH-2018 reglamentida mavjud emas.

P.S.-2. "G" guruhi g‘olibi 1/8 finalda nisbatan kuchsizroq hisoblangan Yaponiyaga to‘g‘ri keladi. Ammo chorak finalda bu juftlik g‘olibi Braziliya/Meksika juftligi g‘olibiga qarshi to‘qnash keladi.

Nimchorak finalda Kolumbiya bilan o‘ynaydigan terma esa, bu bosqichdan o‘tib olsa, chorak finalda Shvesiya/SHveysariya juftligi g‘olibiga raqib bo‘ladi. Xo‘sh, qaysi biri qulayroq: guruhda 1-o‘rinni egallashmi yoki ikkinchi bo‘lish?