2017 йилнинг сўнгида Малайзия пойтахти Куала-Лумпурда Ўзбекистон футбол ассоциацияси 1-вице президенти Умид Аҳмаджонов Осиё Футбол Конфедерацияси президенти Шайх Салмон бин Иброҳим ал-Халифа билан расмий учрашув ўтказган эди.

Учрашувда мамлакатимизда футболни ривожлантиришга асосланган турли лойиҳалар бўйича ўзаро ҳамкорлик масалалари муҳокама қилинган ҳамда ОФК томонидан Ўзбекистонда болалар учун мўлжалланган мини-футбол майдончалари барпо этилиш учун маблағ ажратилишига келишилган эди.

Ушбу келишувга асосан Осиё футбол конфедерацияси томонидан бир қатор қурилиш компаниялари ўртасида махсус тендер ўтказилди. Тендерда спорт иншоотларини барпо қилиш бўйича катта тажрибага эга бўлган Hatko компанияси ғолиб чиқди.

Hatko компанияси мутхассислари бугун пойтахтимиз Тошкент шаҳрига етиб келишди. Куннинг биринчи қисмида Ўзбекистон футбол ассоциацияси мутасаддилари ҳамда Hatko компанияси мутхассислари ўртасида учрашув бўлиб ўтди. Учрашувда “Чиғатой” спорт базасида қуриладиган сунъий қопламали майдоннинг лойиҳаси муҳокама қилинди.

Куннинг иккинчи қисмида муҳокама “Чиғатой” спорт базасида давом этди. Туркия компанияси вакиллари стадион қуриладиган ер майдонини кўздан кечириб, қурилишни бошлаш учун зарур бўладиган чора-тадбирларни белгилаб олишди.