Шуҳрат Қорабоев бошчилигидаги “Навбаҳор” ёшлар жамоаси 20-28 июнь кунлари вилоятимизнинг тоғли ҳудуди бўлган Косонсойда ўз ўқув-машғулот йиғинини ўтказди.
Ёш “лочинлар” мазкур йиғин давомида кунига 2 маҳалдан машғулотлар ўтказиш билан бирга, 2та ўртоқлик учрашувида ҳам майдонга тушишди. Дастлаб футболчиларимизга Наманган вилоятининг 2-лига вакили “Косонсой” жамоаси рақиб бўлди. Мазкур ўйинда ёшларимиз йирик – 8:0 ҳисобида ғалаба қозонишди. Голларга Акмал Турғунбоев (5та), Билолхон Тошмирзаев (2та) ва Аҳмад Мамадалиев муаллифлик қилишди.
Иккинчи баҳс эса Андижон вилоятининг 2-лига жамоаларидан тузилган терма жамоага қарши ўтказилди. Мазкур баҳсда ҳам ёш “лочинлар” йирик ҳисобда ғалаба қозонишди – 4:1. Наманганликларнинг голларига Акмал Турғунбоев (2та), Аҳмад Мамадалиев ҳамда Билол Тошмирзаев муаллифлик қилишди.
Қисқаси, ёшлар жамоамизнинг Косонсойдаги ўқув-машғулот йиғини самарали тарзда якунланди.
“Навбаҳор” ПФК матбуот хизмати.
