Хабарингиз бор, сўнгги пайтларда Миллий олимпия қўмитаси бир қанча спорт федерациялари билан биргаликда аҳолини спортга қизиқтириш мақсадида турли спорт тадбирларини ташкил этмоқда.
Бу борада истироҳат боғларида спорт сайллари, мактабгача таълим муассасалари тарбияланувчилари учун мастер-классларни мисол қилиб келтиришимиз мумкин.
Бундай тадбирларни ташкил қилишда таэквондо WTF ассоциацияси анча фаол. Таэквондо мутахассислари спортнинг ушбу турини оммалаштириш йўлида Қорақалпоғистоннинг Амударё туманигача боришди. У ерда янги номларни саралаб олиш мақсадида турнир ўтказилди.
Кўргазмали чиқишлар эса водийда ташкил қилинди. Наманган шаҳри ва Фарғонанинг Риштон туманидаги истироҳат боғларида ташриф буюрувчилар учун таэвондо сайли ташкил этиб берилди. Унда вилоятнинг етакчи ёш спортчилари кўргазмали чиқишлар қилиб, ўз маҳоратларини намойиш этиб беришди.
