Жаҳон чемпионатида нимчорак финал босқичидаги энг шиддатли ўйин бўлиб ўтди. Бельгия ва Япония терма жамоалари ўртасидаги ўйинда европаликларнинг осонгина ғалаба қозониши кутилганди. Аммо кунчиқар юрт вакиллари кучли рақибни анча қийнаб қўйишди...

Японлар анча тартибли ўйин намойиш қилишди. Улар керак пайтда ҳимояланишди, зарур бўлганда тўпни назорат қилишди, имкон бўлиши билан ҳужумлар ташкил қилишди. Биринчи бўлимда хавфли вазиятлар яратиш бўйича кичик устунлик Бельгия томонида бўлди, аммо танаффусга қадар дарвоза дахлсизлиги сақланиб қолди.

Қитъадошларимиз иккинчи бўлимни жуда кучли бошлашди. Баҳснинг 49-дақиқасида Харагучи дарвозабон билан яккама-якка вазиятга чиқиб бориб, аниқ зарба билан Куртуани доғда қолдирди.

Орадан 2 дақиқа ўтиб европаликлар ҳисобни тенглаштиришлари мумкин эди. Мертенснинг узатмасига Азар дарвозагача 12-13 метрлардан зарба берди. Тўп эса устунга тегиб қайтди. Орадан яна 2 дақиқа ўтиб "самурайлар" иккинчи голни уришди. Такаши Инуи жарима майдончаси ташқарсидан шундай зарба бердики, Тибо Куртуа тўпга қанчалик ташланмасин, уни қайтара олмади.

Мазкур ўйинда воқеаларнинг бундай ривожланишини ҳеч ким кутмаганди. Бельгияликлар биринчи жавобини тўпини киритишлари омад ҳам роль ўйнади. Япония рақибнинг ҳужумини бартараф этгандек кўринганди, аммо Вертонген ўткир бурчак остида бош билан узатма-зарба берди. Тўп эса дарвозабоннинг устидан ошиб ўтиб, тўсинни силаганча тўрга бориб тушди.

Орадан 4 дақиқа ўтиб ҳисоб тенглашди. Азар чап қанотдан тўпни юқоридан етказди, Феллайни бош билан дарвозани ишғол қилди — 2:2.

Ўйиннинг асосий вақти тугашига 3 дақиқа қолганида Япония посбони Кавасима бир вазиятда икки марта сэйв намойиш қилиб, муқаррар голдан жамоасини қутқариб қолди. Ўйинга қўшиб берилган 4 дақиқа ичида японияликлар иккита хавфли вазият яратишди. Ҳар иккала сафар Куртуа ажойиб ўйин кўрсатди.

Япония бурчак зарбасини амалга оширган пайтда эса Куртуа тўпни эгалладию, жамоасининг қарши ҳужумига асос солди. Мазкур ҳужумда сон жиҳатдан кўпчиликни юзага келтирган бельгияликлар ғалаба тўпини киритишди. Ўнг қанотдан етказилган узатмани Лукаку ўтказиб юборди, Шодли эса бўш дарвозани ишғол қилди!

Ўйин давомида иккита тўп билан олдинда борган "самурайлар" шок ҳолатга тушиб қолишди. Улар бунга муносиб эмасдилар, улар энг камида қўшимча бўлимларда ўйнашга ҳақли эмасдилар. Аммо бу футбол...

Бельгия терма жамоаси чорак финалда Бразилияга қарши майдонга чиқади.

ЖЧ-2018. Нимчорак финал
Бельгия – Япония 3:2 (0:0, 3:2)
Голлар: 0:1 – 48 Харагути, 0:2 – 52 Инуи, 1:2 – 69 Вертонген, 2:2 – 74 Феллайни, 3:2 – 90 Шадли.
Бельгия – Куртуа, Алдервейрелд, Компани, Вертонген, Менье, де Брюйне, Витцель, Феррейра Карраско (Шадли, 65), Мертенс (Феллайни, 65), Азар, Лукаку.
Япония – Кавасима, Сакаи, Йосида, Седзи, Нагатомо, Хасебе, Шибасаки (Ямагути, 81), Харагути (Хонда, 81), Кагава, Инуи, Осако.
Огоҳлантириш: Шибасаки (40).