Мексикалик афсонавий футболчи Рафа Маркес бутсаларини михга илишга қарор қилди. 39 ёшли ҳимоячи футболчилик фаолиятини якунлаётганини эълон қилди.

"Ўйлайманки, энди бўш вақтимни мароқли ўтказаман. 22 йил давомида узлуксиз тўп тепдим. Энди фаолиятимни якунлайман. Албатта, келажакдаги фаолиятим футбол билан боғлиқ бўлади", – деди Маркес.

Маркес ЖЧ-2018да 3та ўйинда майдонга тушди. У фаолияти давомида 5та Мундиалда иштирок этган кам сонли футболчилардан бири.

Рафаэль Маркес Гвадалахара шаҳрининг "Атлас" клуби тарбияланувчиси ҳисобланади. Фаолияти давомида у "Монако", "Барселона", "Нью-Йорк Ред Буллз", "Леон", "Верона" клубларида ўйнаган. Сўнгги икки ярим йилни у ўзининг жонажон жамоасида ўтказди. Маркес Мексика терма жамоаси 1997 йилда дебют қилиб, бу вақт давомида 146та ўйинда майдонга тушиб, 19та гол урди.

Рафа Маркес фаолияти давомида 18та турли совринларни қўлга киритган. Уларнинг орасида 6та мамлакат чемпиони ва 2та Чемпионлар лигаси бор.