Грузиянинг Тбилиси шаҳрида спорт курашлари бўйича Гран-При мусобақаси давом этмоқда.

Мусобақада эркин курашчимиз Аббос Раҳмонов (-61кг) финалгача етиб боргани ҳақида хабар бериб ўтгандик. Афсуски, у ҳал қилувчи жангда грузиялик Бека Ломтадзега имкониятни бой бериб қўйди ва мусобақанинг кумуш медали билан кифояланди.

-74кг вазн тоифасида юртимиз шарафини ҳимоя қилаётган Бекзод Абдураҳмонов эса мусобақа давомида Туркия, Грузия, Россия ва Қозоғистон вакилларини мағлубиятга учратиб, финалгача етиб борди. Энди у олтин медаль учун туркиялик Якуп Горга қарши гиламга чиқади.

Юнон-рум кураши бўйича беллашувларда эса -55 кг вазн тоифасида мусобақада иштирок этган Илҳом Баҳромов бронза медалига сазовор бўлди. -60кг вазнли Ислом Баҳромов эса финал йўлланмасини қўлга киритди. У олтин медаль учун Меҳрдод Мардонига қарши баҳс юритади. Ислом финалгача бўлган йўлда уч нафар грузиялик ва бошқа бир ҳамюртимиз Фируз Тўхтаевни мағлуб этди. Ўз навбатида Тўхтаев мусобақада Грузия ва Болгариядан ташриф буюрган полвонлардан устун келди. Энди у бронза медали учун грузиялик рақибга қарши кураш олиб боради.