Gruziyaning Tbilisi shahrida sport kurashlari bo‘yicha Gran-Pri musobaqasi davom etmoqda.
Musobaqada erkin kurashchimiz Abbos Rahmonov (-61kg) finalgacha yetib borgani haqida xabar berib o‘tgandik. Afsuski, u hal qiluvchi jangda gruziyalik Beka Lomtadzega imkoniyatni boy berib qo‘ydi va musobaqaning kumush medali bilan kifoyalandi.
-74kg vazn toifasida yurtimiz sharafini himoya qilayotgan Bekzod Abdurahmonov esa musobaqa davomida Turkiya, Gruziya, Rossiya va Qozog‘iston vakillarini mag‘lubiyatga uchratib, finalgacha yetib bordi. Endi u oltin medal uchun turkiyalik Yakup Gorga qarshi gilamga chiqadi.
Yunon-rum kurashi bo‘yicha bellashuvlarda esa -55 kg vazn toifasida musobaqada ishtirok etgan Ilhom Bahromov bronza medaliga sazovor bo‘ldi. -60kg vaznli Islom Bahromov esa final yo‘llanmasini qo‘lga kiritdi. U oltin medal uchun Mehrdod Mardoniga qarshi bahs yuritadi. Islom finalgacha bo‘lgan yo‘lda uch nafar gruziyalik va boshqa bir hamyurtimiz Firuz To‘xtayevni mag‘lub etdi. O‘z navbatida To‘xtayev musobaqada Gruziya va Bolgariyadan tashrif buyurgan polvonlardan ustun keldi. Endi u bronza medali uchun gruziyalik raqibga qarshi kurash olib boradi.
