Ўзбекистон футбол ассоциацияси томонидан жорий йилнинг апрель- май ойларида мактаб ўқувчилари иштирокида “Чарм тўп” мусобақаси ташкил қилинганидан футбол ихлосмандларининг хабарлари бор.

Эндиликда ушбу футбол эстафетаси маҳалла ёшлари ўртасида давом эттириладиган бўлди.

Ўзбекистон Республикаси Вазирлар Маҳкамасининг 2018 йил 3 июлдаги 13-сонли йиғилишига асосан, Ўзбекистон футбол ассоциацияси томонидан маҳалла ёшлари ўртасида футбол бўйича "Чарм тўп" мусобақаларини минтақавий ва Республика босқичини ўтказиш юзасидан чора тадбирлар ишлаб чиқилди.

Унга кўра 17-22 ёшдаги маҳалла ёшларидан иборат жамоалар июлб-август ойларида 4 босқичли тизимда куч синашадилар:
1-босқич: маҳаллалараро;
2-босқич: туман (шаҳар) миқёсида;
3-босқич: вилоят миқёсида;
4-босқич: республика миқёсида (финал).
Финал босқичи Тошкент шаҳридаги “Миллий” стадионида ташкил қилинади.

Мусобақа Ўзбекистон футбол ассоциацияси томонидан Ўзбекистон Жисмоний тарбия ва спорт вазирлиги, Фуқароларнинг ўзини ўзи бошқариш органлари фаолиятини мувофиқлаштириш республика кенгаши, Ўзбекистон ёшлар иттифоқи билан ҳамкорликда ўтказилади.