Суперлиганинг 16-тури доирасида бўлиб ўтган "Бунёдкор" - "Қизилқум" ўйинидан кейинги матбуот анжуманида дастлаб меҳмонлар бош мураббийи Ҳамиджон АКТАМОВ иштирок этди.

— Оғир ўйин бўлди. Майдон эгалари хато қилишимизни кутишди ва амалда бунга эришишди. Улар икки вазиятда бизни жазолашди. Иккала голни ҳам ўзимиз “олиб келдик”. Хатолар қимматга тушди. Агар ўзимиз ўйин давомида юзага келтирган хавфли вазиятларимизни голга айлантира олганимизда, якуний ҳисоб умуман бошқача кўринишда бўлиши мумкин эди.

Бугунги учрашувда қарши ҳужумлардан фойдаланишни мақсад қилгандик. Аммо, мағлубиятни ўзимизнинг иккита хато эвазига сотиб олдик. Беш нафар легионернинг ҳаракати ҳам бугун фойда бермади.

Битта ўйинда ютқазгани учун жамоани “кўмиб” қўйиш ҳам керак эмас. Бундан аввалги 5-6та учрашувда мағлубиятга учраганимиз йўқ. Жўжани кузда санаймиз. Ҳали олдинда ўйинлар бор.

Суперлигада кучли олтиликка киришга ҳаракат қиламиз. Назарий жиҳатдан ҳали имкониятимиз бор. Ўзбекистон кубоги учун мақсад қўйилган. Қуръа натижасига кўра 1/4 финалда “Қўқон-1912” жамоаси билан ўйнаймиз. Жорий йил ҳисобидан чемпионатда иккита, кейин назорат ўйинларида ҳам бу жамоа билан тўқнаш келдик. Умумий устунлик биз томонда. Ўйлайманки, биз “Қўқон-1912” тўсиғидан ўтиб оламиз, -дейди Ҳамиджон Ғуломович.