Superliganing 16-turi doirasida bo‘lib o‘tgan "Bunyodkor" - "Qizilqum" o‘yinidan keyingi matbuot anjumanida dastlab mehmonlar bosh murabbiyi Hamidjon AKTAMOV ishtirok etdi.

— Og‘ir o‘yin bo‘ldi. Maydon egalari xato qilishimizni kutishdi va amalda bunga erishishdi. Ular ikki vaziyatda bizni jazolashdi. Ikkala golni ham o‘zimiz “olib keldik”. Xatolar qimmatga tushdi. Agar o‘zimiz o‘yin davomida yuzaga keltirgan xavfli vaziyatlarimizni golga aylantira olganimizda, yakuniy hisob umuman boshqacha ko‘rinishda bo‘lishi mumkin edi.

Bugungi uchrashuvda qarshi hujumlardan foydalanishni maqsad qilgandik. Ammo, mag‘lubiyatni o‘zimizning ikkita xato evaziga sotib oldik. Besh nafar legionerning harakati ham bugun foyda bermadi.

Bitta o‘yinda yutqazgani uchun jamoani “ko‘mib” qo‘yish ham kerak emas. Bundan avvalgi 5-6ta uchrashuvda mag‘lubiyatga uchraganimiz yo‘q. Jo‘jani kuzda sanaymiz. Hali oldinda o‘yinlar bor.

Superligada kuchli oltilikka kirishga harakat qilamiz. Nazariy jihatdan hali imkoniyatimiz bor. O‘zbekiston kubogi uchun maqsad qo‘yilgan. Qur’a natijasiga ko‘ra 1/4 finalda “Qo‘qon-1912” jamoasi bilan o‘ynaymiz. Joriy yil hisobidan chempionatda ikkita, keyin nazorat o‘yinlarida ham bu jamoa bilan to‘qnash keldik. Umumiy ustunlik biz tomonda. O‘ylaymanki, biz “Qo‘qon-1912” to‘sig‘idan o‘tib olamiz, -deydi Hamidjon G‘ulomovich.